تأخر موعد الاقلاع من مطار ابو ظبى أحد الركاب قال بمنتهى البساطه ((الطيار النضيف بيبان من مواعيدو ...الطيار ده مش محترم )) حسيت انو بيتكلم عن سائق قطار مثلا او سائق حافله ....ولم اتمالك نفسى من الضحك خاصه مع اصرار أخى ان يبين له ان الطيار مالوش اى علاقه بالتأخير ....اثناء الرحله تعرضت الطياره لمطبات هوائيه عاديه جدا كانت تحدث بعض الاهتزازات فى الطائره ....ونظراً لان اخى اهتم بتفسير اسباب تأخر الطائره .....كل ما الطياره تتهز يجو يسألو الباشمهندس بتتهز ليه ؟؟؟ماهو طالما عارف الطياره بتتاخر ليه لازماً ولابد يكون عارف بتتهز ليه!!!!

استدعيت المضيفه حوالى اربع مرات خلال نصف ساعه ...لأطمئن على سلامه محركات الطائره (دى احدى عاداتى الحميده )ورغم يقينى ان دور المضيفه هو طمأنت الركاب حتى لو كانت الطائره على وشك السقوط ...الا انى مصره على سؤالى الغبى و تحمل الابتسامه الغبيه من المضيفه ......

على ارتفاع شاهق لا أعرف كم قدم (ولا أهتم بمعرفه ذلك لانى ماعرفش القدم كام سم اصلا) حلقت الطائره على مدى ثلاث ساعات من المنامه الى الاسكندريه ....حلقت فوق صحراء واسعه لم اتبين من تفاصيلها شئ سوى لون الرمال الاصفر (دى اول مره فى حياتى اسافر بالنهار ...وصدق من قال النهار له عنيين) عندما اعلنت المضيفه بدء الهبوط التدريجى ...كان نفسى أحدد مكان بيتنا من فوق بس للاسف ماعرفتش ....

عادل أمام كان عندو حق اما قال البلد دى الى يشوفها من فوووق غير الى يشوفها من تحت

ورغم انى كنت متوقعه ان فيه اجراءات حجر صحى او اى حاجه يعنى استقبلتنا اسكندريه بوجه بشوش جداً و على لسانها جمله واحده لا تتغير ...كل سنه وانتو طيبييين ....

كانت الرحله مختلفه فى كل شئ ....ورغم انى بكره التغيير (بمعنى أدق بتشأم منو ) إلا انها كانت رحله لذيذه جداً ...حتى الراجل بتاع الجمرك اكتفى بالنظر الينا (انا واخى ) وقال انتو لوحدكو يا شباب ...معاكو اى حاجه ...واكتفى بأمانتنا فى الرد و قال لنا بوجه بشوش جداً حمد لله على السلامه .

فعلا حمد لله على سلامتى